又到聖誕 工作要慢一點

聖誕既氛圍開始係office蔓延，玻璃門上既噴雪，大堂兩米高既藍色閃閃聖誕樹，仲有唔少可愛聖誕小掛飾出現係女同事既座位上。大家係工作上自動放慢手腳，辛苦左足足一年，心情梗係要放輕鬆一下！

係呢個大浪漫節日，心機都放晒係計劃一班老友出黎gathering定係兩口子甜蜜渡過上面。通常臨近呢個咁溫馨既日子，平時板口板面既老闆都會加入討論買咩禮物俾老婆同埋小朋友哄佢地開心，又會主動問下邊間餐廳食大餐易book位又抵食。呢個時候，你就要識做啦！

一班慳妹OL就發揮到佢地強大既作用啦，除左平時係報紙雜誌剪coupon抽護膚品sample外，仲識係超級市場買野儲積分同埋印花去換五花八門既現金劵。

儲埋儲埋一啲用唔著既貴價餐廳既優惠劵或者VIP卡黎借花敬佛，老闆表面上唔好意思收，但係著數既野邊個會嫌多？最緊要係，佢開始記得你。

聖誕前夕，日日holiday mood，老闆同樣會被感染開始鬆懈落黎。有空缺要請人？放完假先啦，順理成章一句

年尾年頭有幾日紅日唔通咁荀益新人？

要brainstorm出年既活動rundown？唔洗咁急既，啲同事係假期各自去唔同聚會或者出埠話返黎實會有更多新諗頭。

要大掃除filing房既陳年檔案？嗯……咁就要先準備定勞工手套、短梯和分配人手等等，不過聖誕前後同事輪流放大假，為公平起見，要遲啲齊人先開到工！

藉住聖誕，更應該與平日積怨已久既同事泯恩仇。部門一般都會搞番場狂飲在狂食既聖誕派對，例牌抽下禮物，又會搵啲多才多藝既同事表演下咁。

捉啲平時無咩兩句加埋面左左既同事係老闆面前做番場好戲，齊齊玩mini game，忍住一直以黎既芥蒂嘗試去望對方多幾眼，講多兩句說話。

 

你會發現原來唔係想像中艱難，大方既同時自己既心亦會好過唔少。

聖誕應該停止工作，等濃厚既和諧氣氛充斥每個打工仔心入面，暫時忘記密密麻麻既工作和麻煩既人事關係，調整應有既心情，慢活一陣子。

文章刊於作者HR熊 - 職場航行日誌 Facebook及個人網頁，獲授權轉載。